Այնքա՜ն հեշտ ես հավատում, երբ հույս ունես.Ռեմարկ

 «Երբ մարդ մեռնում է, մի տեսակ կարևոր է դառնում, իսկ երբ կենդանի է, ոչ ոք նրանով չի

հետաքրքրվում»։

Էրիխ Մարիա Ռեմարկ

Էրիխ Մարիա Ռեմարկը գերմանացի ականավոր գրող է; 20-րդ դարի ամենահանրահայտ և ընթերցվող գրողներից: Նրա լավագույն ստեղծագործություններից են`«Արևմտյան ռազմաճակատում անփոփոխ է», «Երեք ընկեր», «Հաղթական կամար» վեպերը և այլ երկեր: Առաջ է քաշել «կորուսյալ սերունդ» գրական հասկացությունը:

Էրիխ Մարիա Ռեմարկը ծնվել է 1898թ.-ի հունիսի 22-ին Օսնաբրյուկ քաղաքում: Ծնողները եղել են Պիտեր Ֆրանց Ռեմարկը և Աննա Մարիա Ռեմարկը: 1904թ.-ին ընդունվել է եկեղեցական դպրոց, իսկ 1912թ․-ին շարունակել է ուսումը կաթոլիկ մանկավարժական սեմինարում` ուսուցիչ դառնալու նպատակով: 1915թ.-ին շարունակել է կրթությունը Օսնաբրյուկի արքայական սեմինարում, որտեղ ծանոթացել է Ֆրից Խյորսեմայերի հետ, ով ոգեշնչման աղբյուր է հանդիսացել Ռեմարկի գրական գործ
ունեության առաջացման և ծավալման համար:

Ռեմարկի մանկության և կյանքի ընկեր Հանս-Գերդ Րեյբի կողմից կատարված հետազոտությունը հաստատել է այն փաստը, որ Ռեմարկն ունեցել է ֆրանսիական արմատներ: Ռեմարկի «Լիսաբոնի գիշերը» նրա ամենասիրված վեպերից մեկն է: 

«Լիսաբոնի գիշերը» վեպում Էրիխ Մարիա Ռեմարկն անդրադառնում է պատերազմին և դրան հաջորդած գերմանական արտագաղթի թեմային։ Բայց, միևնույն ժամանակ, սա պատմություն է սիրո մասին, որի առջև նույնիսկ մահն է զենքերը վայրը դնում։Գիրքն առանձնանում է խորիմաստ բազում մտքերով, որոնցից մի քանիսը ներկայցնում ենք ստորև․

-Փախուստի, հուսահատության ու վտանգի մեջ սովորում ես հրաշքներին հավատալ, այլապես ողջ չես մնա։

-Սիրո մեջ միշտ չափից շատ ես հարցեր տալիս ու երբ սկսում ես ուզել պատասխաններն իրոք իմանալ, այն շուտով անցնում է:

-Տարօրինակ է՝ ինչպիսի ծուռումուռ ճանապարհներ ենք հաճախ ընտրում, որպեսզի ցույց չտանք՝ ինչ ենք զգում:

-Այնքա՜ն հեշտ ես հավատում, երբ հույս ունես։

Սոնա Լևոնյան

Արաբկիրի Հայորդյաց Տան Լրագրության դասարան